Portal de Noticias Cedeira OnLine Café Bar A MARINA - PIMPINELA

Logo do acto na Serra de A Capelada, cheo de pompa e circunstancia (incluíndo a presencia do ministro conselleiro do Reino Unido, un señor de Aberdeen), do que informou moi ben este xornal a través de Lorena Romero, que alí estaba pasando o mesmo frío que os demais presentes, fumos ao Auditorio cedeirés ver “Pimpinela Smith”, unha película protagonizada, dirixida e producida polo propio Leslei Howard.

Véndoa, ollando o seu canonazo a prol da democracia, fican poucas dúbidas. Se os “junkers” asasinos que derrubaron o Ibis non ían a por Leslie Howard ben poderían telo feito. Xente como este actor son os que foron alén do “king and country”, e hai unha película de Joseph Losey que denuncia o terrible do patriotismo aproveitado, para que a palabra libertade non quedase fóra do mapamundi que os nazis pretendían volver deseñar. Por iso a importancia do acto do sábado en Cedeira, e a recriación dun mito. O de menos a exactitude do lugar onde o Ibis caeu. O importante o feito, ao que se chega pola vontade dun mitómano, José Rey Ximena, artíficieiro da homenaxe, demostrativo do que pode un home só cando é teimoso, liberal e consecuente.

E quero salientar a proclama do Alcalde de Cedeira, Xosé Luís Vergara, quen aproveitou o acto d´A Capelada para ceibar unha oración ilustrada: emotiva, pedagóxica e europeista. Loureiros verdecidos para quen como Leslie Howard souberon, co seu sacrificio, termar dun mundo para todos.

© Vicente Araguas - Diario de Ferrol

Link: DFONline