As obras da nova lonxa de Cedeira finalizarán o 11 de outubro e as poxas de peixe, que levan máis dun ano realizándose nun local próximo, comezarán antes de que finalice este mes, segundo confirmou a Consellería do Medio Rural e do Mar. A primeira fase dos traballos, que prevían acabar en 2008, concluíu ao ano seguinte, cando se consignou unha partida de 1,9 millóns para o remate. Pero a execución da segunda fase do proxecto non comezou ata finais de 2012. A obra acumula, xa que logo, uns tres anos de atraso.