Portal de Noticias Cedeira OnLine Café Bar A MARINA

Concello de Cedeira - DOGA

Concello de Cedeira

ANUNCIO de información pública sobre actividade dunha planta de coxeración con biomasa forestal no parque empresarial da Trabe (expediente 2012/U006/000001).

Agustín Muñoz León, en representación de Auténtica Generación Distribuída de Castilla y León S.L. (AGD CyL S.L.) solicitou neste concello licenza municipal para a actividade dunha planta de coxeración con biomasa forestal no parque empresarial da Trabe (parcelas 23-24), de Cedeira.

En cumprimento do disposto no artigo 8.3 do Decreto 133/2008, do 12 de xuño, polo que se regula a avaliación de incidencia ambiental, procédese a abrir un período de información pública de 20 días desde a publicación do presente anuncio no Diario Oficial de Galicia, no Boletín Oficial da provincia, e no taboleiro de anuncios do concello, para que, quen se vexa afectado dalgún xeito pola dita actividade, presente as observacións que considere pertinentes.

De conformidade co artigo 59.5 da Lei 30/1992, do 26 de novembro, de réxime xurídico das administracións públicas e do procedemento administrativo común, por medio do presente anuncio comunícaselles aos interesados, aos cales non sexa posible notificar persoalmente ou cando se ignore o lugar de notificación, que están notificados para todos os efectos, informándooss do prazo de 20 días hábiles, contados a partir do día seguinte ao da publicación deste anuncio, para alegaren o que consideren oportuno.

O expediente obxecto desta información poderase examinar no Servizo de Urbanismo e Arquitectura deste concello durante o horario de atención ao público.

Cedeira, 13 de abril de 2012.
Leopoldo Rubido Ramonde
Alcalde

A Lingua - Xosé Antonio Suárez Aneiros

A lingua

A lingua é a herdanza
dos nosos ancestros.
A lingua é a cerna
de rexos sentimentos.

A lingua é o sangue,
a lingua é a alma
das veas galegas.
do pobo que clama.

A lingua é un río
que rega a terra,
penetra, fecunda
e sen ela berra.

A lingua é a nai,
o pai, os irmáns,
a terra, o chan,
o sustento e o pan.

Fala mol e fala rexa,
fala da alma e do corpo,
fala que se non falamos
quedaremos sempre orfos.

Porque se morre a fala,
morrerá tamén o pobo,
a parte espiritual
será comesta do lobo.

Teño unha mágoa na alma:
a herdanza de mil anos,
por falla de escrúpulos,
vaise romper en anacos.

Teño unha mágoa na alma
que me fire con dor:
non sei se fixen dabondo
pola fala dos avós.

Cedeira, 17 de maio de 2012.

Xosé Antonio Suárez Aneiros

Concello de Cedeira - Emprego municipal

Resultado do proceso selectivo para a formación dunha bolsa de traballo para realizar contratacións laborais temporais ou nomeamentos interinos como limpiador/a:

Conflito de intereses e urbanismo. A propósito dun caso

Un artigo de Gabriel Beceiro publicado no OLLAPARO, a Revista da Sociedade Cultural " CHIRLATEIRA"

" Aqueles a quen a natureza deu habilidades e medios para gobernar … a estes homes de Estado é moi necesario, e, posiblemente, máis ca os filósofos, a forza e desprezo por bens externos, así como a paz de espírito e un clima sereno e non axitado, non ter ansias de futuro e vivir con gravidade e afouteza. ” Cicerón

Os antigos gregos, alomenos para os que gostaban de practicar a filosofia, à pregunta: o que é mellor, o goberno dos homes ou das leis? respondian que cando as leis son boas para a comunidade política sempre que os homes as respeiten e as cumpran, mas, dada a evidencia de que elas non son respeitadas, a resposta era ter bos homes (si, filósofos eran, mais esquencían as mulleres) porque eles actuan corretamente en cada unha das súas accións e respeitan a lei. Noutras palabras, como di Adela Cortina, o dereito pode imporse dende fora, non asín a moral.

De feito, unha das causas que levan á desconfianza nas institucións públicas é a falta de principios e valores éticos, o que leva a defectos ou actitudes antiéticos, aumento da corrupción, abuso de autoridade e tráfico de influencias, etc. Situacións que impiden a consecución dos obxectivos institucionais.

Neste sentido, é evidente que a información só flue cando interesa, e no sentido que interesa. Constatar iso, sospeitar iso, reforza o desapego cara os procesos de participación canalizados formalmente dende as institucións, ainda que tamén permite explorar novos xeitos de traballar pola democracia dende o mundo local. Por iso convén acceder ao detalle para podermos ver, alomenos, unha parte da totalidade. Non pode ser doutro xeito xa que a ética para os servidores públicos refírese a situacións de aplicación. O ben común, lonxe de ser unha abstracción, materialízase en cada acto realizado nas múltiples instancias da administración pública. "

Pujol na Vila

Cedeira parece haberse convertido no último mes en destino turístico da clase política. Se hai pouco menos dunha semana visitaba a vila mariñeira o ministro de Asuntos Exteriores de España, José Manuel García-Margallo, o pasado domingo facía o propio o histórico expresidente da Generalitat de Catalunya, Jordi Pujol. O político nacionalista desprazouse a Galicia o pasado sábado para exercer como padriño da segunda promoción de graduados en Ciencias Políticas e Administración. O acto, presidido polo reitor da Universidade de Santiago de Compostela (USC), Juan Casares, tivo lugar no Pazo de Fonseca, en Santiago.

Reserva Mariña de Interese Pesqueiro Ría de Cedeira

A Confraría de Pescadores e Mariscadores de Cedeira remitiu onte un fax á Consellería de Medio Rural e do Mar, instándoa a que convoque a reunión do órgano de xestión da reserva mariña. Segundo fontes do depósito esta tería que ter lugar o pasado mes de marzo, tendo en conta que o consello reúnese de forma ordinaria dúas veces ao ano, con todo, a día de onte aínda non foran informados da súa convocatoria.
As reservas mariñas son áreas marítimas de protección cogestionadas, baseadas en directrices de coordinación e cooperación e non de imposición, entre o sector pesqueiro e a administración - neste caso, catro representantes da confraría, un por cada arte máis importante coa que se faena na área e outros tantos responsables da Consellería do Mar -.

O Concello premia a Beatriz Leonardo Labraña

O alcalde de Cedeira, Leopoldo Rubido, fixo entrega onte dunha placa conmemorativa á jovencísima - ten tan só oito anos- acordeonista da vila Beatriz Leonardo Labraña en recoñecemento dunha precoz e excelente traxectoria que a levou a conseguir a Medalla de Ouro no Festival Nacional de Acordeón de Mondragón -Euskadi-.
Nun pequeno acto celebrado no salón de plenos do Concello, coa presenza da súa familia, Beatriz recibiu a homenaxe da corporación polo gran papel realizado nun certame no que se mediu a intérpretes de toda España, moitos deles ata catro anos maiores que ela. Era ademais a súa primeira participación no festival vasco, ao que se presentou animada polo seu profesor, Javier Díaz Carrasco.

Concello de Cedeira - Emprego municipal

ANUNCIO

CONVOCATORIA AOS ASPIRANTES AO PROCESO SELECTIVO
PARA A CONTRATACION LABORAL TEMPORAL DUN/HA
LIMPIADOR/A.

Se convoca aos aspirantes ao proceso selectivo para a contratación laboral temporal dun/ha limpiador/a para a ralización das probas.

Lugar: BIBLIOTECA MUNICIPAL
Data: 08 de maio de 2012
Hora: 10:30

Cedeira, 02 de maio de 2012
O Alcalde,
D. Leopoldo Rubido Ramonde

Teatro JOFRE - Maio 2012

Rubido e García - Margallo

A vila de Cedeira recibiu o pasado martes 1 de maio unha visita de excepción, a do ministro de Asuntos Exteriores de España, José Manuel García-Margallo. O máximo responsable das relacións internacionais aproveitou a súa viaxe a Santiago de Compostela, con motivo dunhas xornadas sobre economía organizadas pola Fundación alemá Konrad Adenauer -ás que tamén acudiron a vicepresidenta do Goberno, Soraya Sáenz de Santamaría e os ministros de Economía, Luís de Guindos e o seu homólogo alemán Wolfgang Schäuble-, para desprazarse á vila onde os seus familiares posúen unha vivenda.

Durante a súa visita García-Margallo asistiu á consagración do novo templo de María Mediadora, bendicido polo bispo da Diocese de Mondoñedo Ferrol, Manuel Sánchez Monge, e que á súa vez suscitou o interese moitos fregueses locais. Durante a súa fugaz estancia estivo acompañado polo alcalde de Cedeira, Leopoldo Rubido, xunto ao que permaneceu sentado durante a liturxia. De feito o alcalde abandonou durante unhas horas as súas obrigacións para compartir o seu tempo co ministro e mostrarlle as riquezas da vila mariñeira.